Brúnir

Símon frá Efri-Rauðalæk í góð verðlaun

einarg — Tue, 15 May 2012 22:34:51 +0000

Síðasliðið sumar notuðum við stóðhestinn Símon frá Efri -Rauðalæk og fáum undan honum í vor og hryssunni Auðnu frá Sólbakka. Símon var að fara í mjög góð 1. verðlaun úti nú í vikunni eða:

Conformation : 8,0 – 9,0 – 8,5 – 8,5 – 8,0 – 8,0 – 9,0 – 8,5 = 8,55
Rideability: 8,5 – 9,0 – 8,5 – 8,5 – 8,5 – 8,5 – 7,0 = 8,46
Total : 8,50.

Það verður spennandi að sjá hvað við fáum nú í vor.

Það er ekki sumarlegt út að líta

einarg — Mon, 14 May 2012 18:14:54 +0000

Þessa dagana blæs hér köldum vindum og ekki sumarlegt út að líta. Einar var búin að undirbúa sig vel, gefa stóðinu í Grýtu og setja allar ær inn áður en þetta skall á. Við vorum búin að hugsa okkur að setja folaldshryssuna einnig inn en þær mæðgur eru í góðu skjóli og kl. fimm í morgun þegar Einar kíkti á þær var ekki einu sinni skjálfti í folaldinu þannig að þær eru úti og virðast una því vel.

Helgin fór í afar skemmtilegt námskeið þar sem við vorum meðal skiptinemaforeldra víða af að landinu og fræddumst um mismunandi menningarheima. Þessir krakkar eru af fara út um allan heim, Perú, Malasíu og mið- og suður Evrópu svo eitthvað sé nefnt.

Sauðburður er brátt á enda og hefur gengið nokkuð vel undanfarið og svo verður vonandi áfram.

Set inn myndir úr myndasafni:-)

Stormur frá Reykjavík

einarg — Wed, 09 May 2012 23:08:55 +0000

Við skruppum á Akureyri í gær og kíktum á Storm hjá Bigga. Við sáum mynd af honum á Fax.is sem ég stal og lauma hér inn. Stormur er í feikna formi og hefur aldrei verið betri, flottur töltari eins og margir af þessum Töfra frá Kjartansstöðum sonum. Biggi og Auður eru búin að nostra við hann og faxið hefur aukist um 100% þó svo það þyngi hann ekki.

Þórhildur Þórálfsdóttir

einarg — Tue, 08 May 2012 19:41:32 +0000

Hér koma myndir af þeirri stuttu sem eins og fyrr segir heitir Þórhildur og er hún jörp. Sauðburður í hámarki og mikið að gera á heimilinu, sveitastjórna- og félagsmálabras svo eitthvað sé nefnt. Stelpurnar í prófum og komandi helgi fer öll i AFS skiptinemana en það verður námskeið til að undirbúa unga fólkið fyrir nýtt ævintýri og okkur foreldrana fyrir aðskilnaðinn. Við erum búin að fá heimaverkefni og svo er bara að standa sig:-)

Fyrsta folald þessa árs komið í heiminn

einarg — Tue, 08 May 2012 00:17:53 +0000

Þegar Einar og Halldór Lind fóru niður í Grýtu í kvöld sáu þeir að Langa-brúnka var köstuð og til allrar lukku er það hryssa og á hún að heita Þórhildur. Faðirinn er Þórálfur frá Prestbæ /faðir Álfur og móðir Þoka frá Hólum. Þetta er hin álitlegasta hryssa og munum við fara og taka myndir af henni á morgun;-) Set inn mynd af Gígjarssyni Löngu-Brúnku frá því í fyrra og Þórálfi.

Kettlingar og lítið lamb:-)

einarg — Sun, 06 May 2012 19:01:05 +0000

Meðan ég var í burtu þá fæddust bæði kettlingar og mjög lítið lamb og þegar ég kom heim aðfaranótt miðvikudagsins þá mætti mér lambið í körfu í vaskahúsinu og þegar haldið var aðeins lengra inn í húsið þá lá læðan þar með þrjá kettlinga. Mýsnar leika sér meðan kötturinn er ekki heima og það lá við að ég byggist við folaldi í baðkerinu. Þau voru alsæl með þennan innibúskap en þetta breyttist aðeins með heimkomu húsmóðurinnar og lambið er komið með fósturmóður og farið niður í fjárhús og læðan er á leiðinni í fjárhúsið með ört stækkandi kettlinga:-)

Það hafa blásið kaldir vindar undanfarna daga en það hefur samt ekki aftrað þeim Kristjáni og Einari að ríða út. Ég set hér inn myndir af Toppu sem er efnileg Rökkvadóttir sem við eigum og Kristján hefur alveg séð um tamninguna á í vetur. Hún fer senn í hvíld en hann ætlar svo að byrja með hana aftur í haust og stefnt er með hana í dóm næsta vor. Set inn stutt og illa tekið video af Toppu en við eigum ekki nógu góða myndavél til að geta tekið betri upptökur;-(

Stutt myndbrot af Toppu

Sauðburður í hámarki

einarg — Wed, 02 May 2012 22:55:06 +0000

Ærnar bera eins og enginn sé morgundagurinn og hefur gengið á ýmsu og höfum við í raun aldrei lent í öðrum eins hremmingum eins og í dag og er vonandi botninum náð í þeim efnum. Hingað til höfum við verið mjög heppin og fáa gripi misst en því var ekki að skipta í dag.

En nóg um það, gróðurinn æðir upp í gróðurhúsinu og í blómabeðunum og vonandi er vorið komið fyrir fullt og allt. Hryssurnar eru orðnar býsna þungar á sér og verður spennandi að sjá folöldin þegar þar að kemur en spenntust erum við að sjá afkvæmi Bjarkar og Birtu.

Ferð okkar skólasystranna til Prag var engu lík, 25-30 stiga hiti, félagsskapurinn óborganlegur og borgin dásamleg. Þetta var gott frí, ekkert stress og röltum við bara um þessa fallegustu borg mið- Evrópu, sigldum á Moldá og nutum lífsins. Þetta verður svo endurtekið eftir 10 ár ef guð lofar.

Þórhildur er í prófum og stendur sig að vanda mjög vel og ætlar svo að taka vaktina með Einari og Ingu systur hans í fjárhúsunum þegar prófunum líkur þann 7. maí.

Set inn myndir af hinu og þessu en myndir frá borginni fögru koma seinna;)

Tiltekt i gróðurhúsinu og kálinu sáð

einarg — Sat, 21 Apr 2012 19:25:10 +0000

Við Inga mágkona tókum vorhreingerningu í gróðurhúsinu í dag og sáðum fyrir mörgum tegundum af káli ásamt fljótsprottnum sumarblómum. Það verður gaman að setja svo blómin út í garð og kálið í kálgarðinn þegar sumarið verður vissulega komið. Hænurnar eru farnar að verpa aftur en þær taka sér alltaf pásu yfir veturinn og byrja svo þegar birta fer að nýju, þessar elskur. Einar mokaði fyrir mig hænsnakofann og það sem úr honum kom fór allt í kálgarðinn en ég nota engan tilbúinn áburð í hann, einungis hænsna- og kanínuskít og hefur það reynst vel.

Kristján og Einar eru þessa stundina enn á hestbaki og nýta sér birtuna og góða veðrið. Þeir hafa verið að eiga við Laufa sem er undan Björk og Rökkva og einnig við Evu frá Sólheimum sem við eigum núna en hún er undan Adam frá Ásmundarstöðum og Kolfinnsdóttur sem er sammæðra Parker frá Sólheimum. Þett er stór og stæðileg hryssa og hreyfingafalleg. Þetta vorið fáum við þrjú folöld undan Gára frá Auðsholtshjáleigu en eins og vitað er stóð hann efstur í flokki heiðursverðlauna stóðhesta fyrir afkvæmi sl. landsmót en í ár verður það Markús sem bankar á dyrnar en hann var hjá okkur tveimur árum þar á undan og eigum við m.a. ógeltan fola undan Birtu og honum sem við bindum vonir við.

Síðasti vetrardagur

einarg — Wed, 18 Apr 2012 23:13:12 +0000

Það sem tíminn líður og sumarið á næsta leiti a.m.k. segir dagatalið það. Annars er allt gott að frétta héðan frá Brúnum, stelpurnar sjást nær aldrei, eru alltaf á ferð og flugi og eru sennilega að aðlaga sig því að vera að fara frá okkur foreldrunum. Pabbi þeirra horfir á þær og spyr „hvert er nú verið að fara „? En svona er lífið og maður er þakklátur fyrir það að fuglarnir geti flogið úr hreiðrinu því það eru ekki allrir fuglar sem geta flogið.

Bústörfin ganga allvel, helgin var notuð mikið til útreiða en lítið það sem af er vikunni sökum fundahalda og félagsmálastúss.

Á morgun, sumardaginn fyrsta stendur hestamannafélagið alltaf fyrir kaffisölu fram á Melgerðismelum og svo er einnig í ár. Sitthvað er í boði fyrir gesti og gangandi og hvet ég alla til að fá sér sveitarúnt og enda á Melunum.

Set hér að gamni inn myndir úr safni fjölskyldunnar og annað sem til fellur.

Birta til Spuna

einarg — Fri, 13 Apr 2012 11:56:32 +0000

Í morgunsárið fékk ég hringingu þar sem staðfest var að Birta fer til Spuna frá Vesturkoti og fer í seinna gangmál eða um 20. júlí í fyrsta lagi. Hún á að kasta í byrjun júní og ætlum við að fara með hana með okkur á landsmótið og fá að geyma hana þar til hún kemst í hólfið. Þetta eru miklar gleðifréttir þó svo að gengið hafi verið frá þessu í fyrra en áskóknin í klárinn er víst gífurleg.

Annars er allt gott að frétta af Brúnafólkinu, alltaf nóg að gera bæði inni og úti. Það fer að styttast í sauðburðinn og í að frúin fari til Prag í 20 ára útskrifarferð með skólasystrunum. Við förum svo einhverntíma með stelpunum suður á AFS námskeið þar sem heil helgi er notuð í að undirbúa þær og okkur fyrir árs aðskilnað og nýja menningu í framandi landi, gaman að vera ungur og heimurinn blasir við :0)

Við ætlum að sjálfsögðu á Fáka og fjör og berja það augum sem þar er boðið upp á, síðan er Níels Birkir bróðursonur minn fermdur þannig að það er til margs að hlakka fyrir helgina.